ស្ទឹងត្រែង៖ អ្នកនាំពាក្យរដ្ឋបាលខេត្តស្ទឹងត្រែងលោក ម៉ែន គង់ បានឱ្យ EAC News ថារហូតមកដល់ពេលនេះនៅ មិនទាន់របាយការណ៍ពីខាងមន្ទីរពេទ្យបញ្ជាក់ប្រាប់ពីការរកឃើញអ្នកជំងឺកូវីដ-១៩ បន្ថែមដោយម៉ាស៊ីន PCR នៅ ឡើយទេ ខណៈរដ្ឋបាលខេត្តនៅ បន្តតាមដានជាមួយមន្ត្រីជំនាញបន្តទៀត។

លោកបានប្រាប់ថា៖ «តាមបច្ចេកទេសគឺមិនទាន់ឃើញលទ្ធផលដែលបង្ហាញភាពច្បាស់លាស់តាមម៉ាស៊ីនធំទេ»។

ទោះជាយ៉ាងណាលោកបញ្ជាក់ថា ពន្ធនាគារខេត្តបានរៀបចំវិធានការបង្ការនៅ ទីតាំងរបស់ខ្លួនរួចរាល់ផងដែរ។

ប្រធានមន្ទីរសុខាភិបាលខេត្តស្ទឹងត្រែង លោក អ៊ុង សូវៀត បដិសេធឆ្លើយទៅ នឹងសំណួរអ្នកកាសែតដោយឱ្យទាក់ទងទៅ ក្រសួងសុខាភិបាលដើម្បីបានព័ត៌មានលំអិត ខណៈអ្នកនាំពាក្យក្រសួងសុខាភិបាល លោកស្រី ឱ វណ្ណឌីន នៅមិនទាន់អាចបញ្ជាក់បានពីលទ្ធផលនៃសំណាកនៅ ឡើយ។

នៅ ថ្ងៃទី៩ ខែធ្នូ ឆ្នាំ២០២១ មានការផ្សព្វផ្សាយមួយចំនួនដែលបានលើកឡើងថា មានករណីផ្ទុះកូវីដ-១៩ លើពិរុទ្ធជនក្នុងពន្ធនាគារខេត្តស្ទឹងត្រែងរួមទាំងមន្ត្រីអនុរក្សពន្ធនាគារប្រមាណជាង៣០០នាក់។ ការចុះផ្សាយនេះត្រូវបានពន្ធនាគារខេត្តចេញលិខិតបដិសេធ និងបានចាត់ទុកថាជាផ្សាយព័ត៌មានមិនពិតដែលមានចេតនាធ្វើឱ្យប៉ះពាល់ដល់ការគ្រប់គ្រង សន្ដិសុខ សុវត្ថិភាព សណ្ដាប់ធ្នាប់ពន្ធនាគារ។

ពន្ធនាគារខេត្តស្ទឹងត្រែងបានបញ្ជាក់ថា៖ «ពន្ធនាគារខេត្ត សូមអះអាងថារាល់ខ្លឹមសារខាងលើនេះគ្មានមូលដ្ឋានពីតួលេខ និងទិន្និន័យច្បាស់លាស់ ដោយការធ្វើតេស្ត (Rapid Test) មិនទាន់យកជាផ្លូវការនោះទេលុះត្រាតែការធ្វើតេស្តឆ្លងកាត់ម៉ាស៊ីនធំហៅ ថា (PCR) ទើបអាចរាប់បញ្ចូលទៅ ក្នុងបញ្ជីនៃអ្នកឆ្លងជំងឺកូវីដ-១៩ ការផ្សព្វផ្សាយព័ត៌មាននេះមានចេតនាធ្វើឲ្យប៉ះពាល់ដល់ការគ្រប់គ្រងសន្តិសុខ សុវត្ថិភាព សណ្តាប់ធ្នាប់ពន្ធនាគារ» ។

បើតាមប្រធានមន្ទីរសុខាភិបាលខេត្តស្ទឹងត្រែងបញ្ជាក់ប្រាប់ EAC News កាលពីយប់ម្សិលមិញថា មានការរកឃើញអ្នកជំងឺកូវីដ-១៩ ម្នាក់ប៉ុណ្ណោះក្នុងពន្ធនាគារ តែមិនអាចចាត់ទុកជាការផ្ទុះរាលដាលនៃជំងឺកូវីដ-១៩ ក្នុងពន្ធនារគារនោះទេ ដោយឱ្យរង់ចាំលទ្ធផលសំណាក PCR ជាមុនសិន៕